Расія фінансава цісне на Беларусь, каб тая дапамагала ў вайне — WSJ
Расійскі амбасадар у Мінску Барыс Грызлоў
Расія ўзмацняе ціск на Беларусь, каб тая больш актыўна ўдзельнічала ў вайне з Украінай. У якасці аднаго з галоўных рычагоў выкарыстоўваецца фінансавая залежнасць Мінска ад Масквы. Пра гэта піша The Wall Street Journal, спасылаючыся на дзейных і былых расійскіх і еўрапейскіх чыноўнікаў.
Былы супрацоўнік расійскіх спецслужбаў расказаў выданню, што Крэмль пагражае абмежаваць фінансавую падтрымку беларускай эканомікі. Большасць такіх перамоваў, паводле яго, з Лукашэнкам вёў расійскі амбасадар у Беларусі Барыс Грызлоў.
Таксама расійскі бок абмяркоўвае магчымасць выкарыстоўваць беларускую тэрыторыю для запуску ўдарных дронаў па Украіне, пашырэнне лініі фронту на заходнім напрамку і адцягненне ўкраінскіх войскаў ад ключавых участкаў баявых дзеянняў на ўсходзе краіны. Акрамя таго Беларусь можа разглядацца як пляцоўка для аперацый супраць дзяржаваў NATO.
Аднак непасрэдны ўдзел у вайне, паводле WSJ, супярэчыць інтарэсам Лукашэнкі, які цяпер спрабуе палепшыць стасункі з Захадам, у прыватнасці з ЗША.
Пры гэтым Беларусь пастаўляе Расіі бензін на фоне ўкраінскіх атак па расійскай нафтавай інфраструктуры. Таксама на тэрыторыі Беларусі размяшчаюцца наземныя станцыі кіравання расійскімі беспілотнікамі, якія атакуюць Украіну.
Суразмоўцы WSJ не бачаць прыкметаў падрыхтоўкі неадкладнага наступу з тэрыторыі Беларусі. Але такі варыянт застаецца сярод сцэнарыяў, якія разглядаюцца ў Маскве.
