Скаргу асуджанага на смерць Андрэя Бурдыкі зарэгістравалі ў ААН

Як паведаміў БелаПАН праваабаронца Раман Кісляк, інфармацыя аб рэгістрацыі скаргі і яе копія накіраваныя ў прадстаўніцтва Беларусі ў ААН у Жэневе.

У адпаведнасці з працэдурнымі правіламі Камітэт па правах чалавека звярнуўся з просьбай да дзяржавы не выконваць прысуд у дачыненні Бурдыкі, пакуль скаргу не разгледзяць па сутнасці.

Праваабаронца сказаў, што ў гэтай скарзе, пададзенай у камітэт 17 снежня, паведамляецца пра парушэнні грамадзянскіх правоў, дапушчаных у дачыненні Андрэя Бурдыкі ў часе расследавання і судовага разбору. Гаворка ідзе, у праватнасці, пра катаванні з мэтай прымусіць чалавека даць паказанні супраць сябе.

Андрэя Бурдыку разам з Алегам Грышкаўцовым асудзілі за некалькі забойстваў і выкраданне дзіця.