Наступнае "акно магчымасцяў" можа быць для Беларусі апошнім — Статкевіч

Беларусь у 1990-х двойчы прапусціла "акно магчымасцяў" пабудаваць дэмакратычную незалежную дзяржаву. Наступнае такое "акно" можа быць апошнім, папярэджвае ў сваім прагнозе палітык Мікалай Статкевіч.

Пры распадзе СССР Беларусь атрымала шанец, але тагачаснае кіраўніцтва імкнулася "вярнуць краіну ў звыклы стан сатэліта Масквы". Другі раз, піша Статкевіч, магчымасць была ў другой палове 90-х: "Беларусі прапанавалі далучыцца да Еўразвязу, што дазваляла атрымаць фінансаванне рэформ і ўжо ў сярэдняй перспектыве ператварыць Беларусь у вольную сучасную і заможную краіну. Але тагачасны кіраўнік дзяржавы адмовіўся ад прапановы, нават не паведаміўшы пра яе грамадству".

Пасля гэтага Расія "вярнулася да традыцыйнай практыкі падпарадкавання суседніх народаў ды ўлучэння іх у склад імперыі". На ўтрыманне сатэлітарных рэжымаў РФ гатовая вылучаць вялікія сродкі.

Цяпер, на думку Статкевіча, для Беларусі можа адкрыцца яшчэ адно "акно магчымасцяў", але яно можа быць апошнім.

"Зараз з-за тупіковай сітуацыі на расійска-ўкраінскім фронце пад пагрозай апынулася існаванне сённяшняга палітычнага рэжыму ў Расіі. Змена ўлады ў Крамлі разам з магчымымі новымі пагрозамі створыць і шанцы для беларускай дэмакратыі. Ці скарыстаецца Беларусь гэтым "вакном магчымасцяў" залежыць найперш ад беларускага грамадства, ад беларусаў, якія жывуць на тэрыторыі сваёй краіны. На ўсіх нас ляжа вялікая адказнасць, бо гэтае "акно" можа быць апошнім для нашай нацыі".

Ён нагадвае, што цяпер беларусы не могуць выказваць свае погляды, бо ўсялякія формы самаарганізацыі ў Беларусі жорстка пераследуюцца. "Але пры змене сітуацыі гэта самаарганізацыя адбудзецца і выявіць сябе вельмі хутка. Магчыма, свет зноў не пазнае беларусаў. Але гэта будзе ўжо зусім іншае непазнаванне. Страх і нянавісць — страшная сумесь", — прагназуе Статкевіч.