У сераду ў Беларусі будзе да +37, а па захадзе краіны чакаюцца залевы і шквалісты вецер

У сераду, 1 ліпеня, у Беларусі прагназуецца пераменная воблачнасць, паведамляе Белгідрамет.

На большай частцы тэрыторыі будзе без ападкаў. Але па захадзе краіны ўдзень чакаюцца навальніцы, месцамі пры навальніцах — моцныя залевы і шквалістае ўзмацненне ветру парывамі 15-20 метраў за секунду, а ў асобных раёнах — 21-24 метраў за секунду. Сіноптыкі абвясцілі аранжавы ўзровень небяспекі па ветры і залевах.

Тэрмометры ўначы пакажуць 17-22 градусы вышэй за нуль, па поўначы будзе 12-16 градусаў цяпла. Удзень прагназуецца ад +27 па паўночным усходзе да +37 градусаў па паўднёвым захадзе. На большай частцы тэрыторыі Беларусі будзе 30-34 градусы цяпла, у Мінску чакаецца +30...+32 градусы. Па тэмпературы сіноптыкі абвясцілі чырвоны ўзровень небяспекі.

У чацвер, 2 ліпеня, будзе воблачна з праясненнямі. На большай частцы тэрыторыі краіны пройдуць кароткачасовыя дажджы. Месцамі чакаюцца моцныя дажджы і навальніцы, удзень магчымы град. Вецер уначы будзе пераменных напрамкаў, удзень — заходняй чвэрці ўмераны, пры навальніцах — парывісты, у асобных раёнах — моцны парывісты.

Уначы тэмпература паветра складзе 17-23 градусы цяпла, па паўночным захадзе прагназуецца 15-16 градусаў вышэй за нуль. Удзень чакаецца ад +21 па захадзе да +35 градусаў па паўднёвым усходзе.