У БДУ адмовіліся пацвярджаць дыплом выпускніцы, якая не паціснула руку Гігіну

Выпускніца факультэта філасофіі і сацыяльных навук БДУ Наталля Грыгарэнка запомнілася многім беларусам сваім учынкам. Пры ўручэнні дыплома ў 2021 годзе яна адмовілася паціскаць руку тагачаснаму дэкану факультэта — прапагандысту Вадзіму Гігіну. Дзяўчына, якую затрымлівалі на адным з жаночых маршаў пратэсту, прыйшла на ўручэнне дыплома ў вышыванцы.

За пяць гадоў, якія прайшлі з таго моманту, Наталля паспела атрымаць грын-карту і перабрацца ў Нью-Ёрк. Аднак там выявілася, што яна не можа ні працягваць адукацыю ні працаваць па спецыяльнасці, хаця прапановы працы ўжо ёсць, піша "Наша Ніва". У абодвух варыянтах трэба атрымаць пацвярджэнне дыплома, а з гэтым узніклі праблемы — у БДУ яе ігнаруюць.

"Я спрабавала звязацца з БДУ ўсімі магчымымі спосабамі. Я звязвалася са сваімі былымі выкладчыкамі, каб хоць нехта мне дапамог з пацвярджэннем дыплома", — расказала дзяўчына ў сацсетках.

Яна абураецца тым, што заплаціла шмат грошай за сваю адукацыю, а ўніверсітэт, які тыя грошы атрымаў, адмаўляецца пацвярджаць дыплом. Грыгарэнка кажа, што спрабавала нават звязацца з кампаніяй, якая платна арганізоўвае кантакт з універсітэтамі: "Я звязалася з такой кампаніяй — яна працуе з 30 ВНУ ў Беларусі, але з БДУ — не, таму што БДУ адмаўляецца пацвярджаць дыпломы".