Праз сіні пашпарт? Польскі аператар адмовіў беларусу ў бясплатным роўмінгу

У непрыемную сітуацыю трапіў чытач Еўрарадыё Павел (імя зменена), які з жонкай і дзіцём адпачываў у Пенінах — горным рэгіёне паўднёва-ўсходняй Польшчы і паўночна-ўсходняй Славаччыны.

Перад паездкай мужчына набыў пакет паслуг ад Play — безлімітныя званкі і інтэрнэт па Польшчы і безлімітныя званкі і 30 гігабайтаў інтэрнэту ў роўмінгу ЕС.

Але роўмінг у Паўла не спрацаваў, калі ў пэўны момант падарожжа тэлефоны беларусаў пераключыліся з польскай станцыі на славацкую.

“Гляджу — у мяне інтэрнэт не спісвае гэтыя гігабайты, а платны тарыф  «зжырае», і званкі таксама платныя. І прама напісана, што званкі і інтэрнэт у тарыфе за мяжой. Карацей, спісала колькі злотыx, нямнога, ва ўсёй сям’і”, — распавядае суразмоўца.

Пасля вяртання з адпачынку Павел прыехаў у офіс Play да знаёмага, які яго і падключаў.

“Ён пачаў разбірацца, і высветлілася, што я ўжо не першы, хто звяртаецца з такой праблемай. Нібыта Play цяпер для беларусаў з «сінім пашпартам» зрабіў платны роўмінг у ЕС — нібыта як санкцыі.

Гэта можна абысці, але трэба напісаць ім заяву з просьбай, каб яны ўключылі табе бясплатны роўмінг, і даказаць сувязь з Польшчай. То-бок даслаць карту побыту, дамову найму жылля, пашпарт і суправаджальны ліст з просьбай”, — кажа суразмоўца.

Санкцый супраць беларусаў няма

У самім Play Еўрарадыё патлумачылі, што ніякага асаблівага стаўлення да карыстальнікаў з беларускім грамадзянствам у іх няма.

“Роўмінгавыя паслугі ў межах адпаведнага тарыфу аказваюцца на аднолькавых умовах для ўсіх кліентаў, незалежна ад іх грамадзянства. Play не ўжывае асобных умоў роўмінгу выключна да грамадзян Рэспублікі Беларусь”, —- распавяла Катажына Бонк, прадстаўніца прэс-бюро мабільнага аператара.

У выпадках з кліентамі, якія не могуць пацвердзіць сталую сувязь з Польшчай, аператар можа запытаць дадатковую інфармацыю. 

“Пасля іх праверкі магчымыя дадатковыя роўмінгавыя аплаты не налічваюцца або адпаведна карэкціруюцца”, — падкрэслілі ў адказе Еўрарадыё.

Гісторыя, калі дапамаглі чыноўнікі

Яшчэ адзін чытач Еўрарадыё, Яўген, некалі аказаўся ў падобнай сітуацыі. Аператар заявіў яму, што для бясплатнага роўмінгу трэба мець сталы побыт у Польшчы. І спасылаўся на дамову, дзе напісана, што абанент мусіць стала пражываць у краіне.

Яўген спрабаваў вырашыць пытанне з Play самастойна.

“Я тлумачыў ім, што радок пра сталае пражыванне ў Польшчы — гэта не сталы побыт. Калі я маю часовае пасведчанне на жыхарства — гэта ўжо значыць, што я жыву тут. Але я ўвогуле маю статус уцекача, і гэта дае бестэрміновы дазвол на знаходжанне ў Польшчы. Але Play не пагаджаліся і заяўлялі, што «стала пражываць» — значыць мець сталы побыт”, — распавядае Яўген.

У выніку ён вырашыў звярнуцца да чыноўнікаў — ва Urząd Komunikacji Elektronicznej (аналаг беларускага Мінсувязі). Некалькі тыдняў там разглядалі зварот Яўгена і ў выніку пагадзіліся з ім.

“Яны мне казалі, што даслалі аператару сваё бачанне сітуацыі і тое, як варта трактаваць умовы атрымання бясплатнага роўмінгу ў ЕС. Play у выніку скасаваў патрабаванне дадаткова плаціць за гігабайты ў роўмінгу, і цяпер ён у мяне бясплатны, як і мусіла быць спачатку”, — кажа беларус.

Тым, хто трапіць у падобную сітуацыю, Яўген раіць звяртацца да чыноўнікаў дзеля абароны правоў.

“Тут справа не ў тым, беларус ты ці не, але ў тым, што такія кампаніі, як аператары ці банкі — большыя бюракраты, чым чыноўнікі. Калі звяртаешся да ўлад у Польшчы, яны сапраўды дапамагаюць. У гэтым адрозненне ад Беларусі”, — дадаў Яўген.