Жанчыны складаюць больш за 70% дактароў у Беларусі — Белстат

На канец мінулага года ў краіне налічвалася 57,9 тысячы дактароў, пры гэтым 72,9% з іх — жанчыны і 27,1% — мужчыны. Яшчэ большы дысбаланс фіксуецца сярод сярэдняга медперсаналу: 95,1% складаюць жанчыны і толькі 4,9% — мужчыны. Усяго ў сістэме аховы здароўя працуюць 123,9 тысячы медсясцёр, акушэрак і лабарантак.

Па структуры дактароў у краіне больш за ўсё тэрапеўтаў — 17,9 тысячы. Далей ідуць хірургі (15,2 тысячы), стаматолагі (5,5 тысячы), дыягностыкі (5,1 тысяча) і педыятры (4,4 тысячы).

Забяспечанасць насельніцтва дактарамі склала 56 спецыялістаў на 10 тысяч чалавек, а сярэднім медперсаналам — 136,8 на 10 тысяч.

Белстат таксама адзначае, што гэтыя паказчыкі вышэйшыя, чым у шэрагу еўрапейскіх краін, уключаючы Германію, Літву, Нідэрланды і Швейцарыю. Пры гэтым найбольшая канцэнтрацыя медыкаў назіраецца ў Мінску, тады як дэфіцыт часцей фіксуецца ў Мінскай вобласці.

Сярэдні заробак у сферы аховы здароўя ў студзені–красавіку склаў 2405,9 рубля. Дактары ў сярэднім зараблялі 4278,3 рубля, сярэдні медперсанал — 2299,8 рубля.