На мяжы ў Брэсце затрымалі мужчыну з какаінам

У пункце пропуску "Брэст" мытнікі затрымалі 31-гадовага пасажыра рэйсавага аўтобуса пры спробе ўвозу ў Беларусь наркатычнага рэчыва. Пра гэта паведамілі ў прэс-службе Дзяржаўнага мытнага камітэта.

Мужчына перасякаў мяжу па "зялёным калідоры" і заявіў, што не перавозіць тавараў, якія падлягаюць дэклараванню або абмежаваныя для перамяшчэння. Аднак падчас кантролю ў супрацоўнікаў мытні ўзніклі падставы для больш дэталёвай праверкі.

Пры аглядзе багажу быў знойдзены лекавы флакон, унутры якога знаходзіўся згортак з парашкападобным рэчывам белага колеру. Экспертыза ўстанавіла, што знойдзенае рэчыва змяшчае 0,69 грама какаіну.

У дачыненні да затрыманага Брэсцкай мытняй узбуджана крымінальная справа па ч. 2 арт. 328-1 КК Беларусі. Санкцыя артыкула прадугледжвае пакаранне да 10 гадоў пазбаўлення волі.