Ад 50 рублёў да 22 тысяч. Колькі зараз грошай ідзе на дзяржсцягі?

“Дзень Дзяржаўнага сцяга, Дзяржаўнага герба і Дзяржаўнага гімна” ўрачыста адзначылі 10 траўня. Прычым з вялікім размахам: улады хваліліся шматметровымі чырвона-зялёнымі сцягамі. Вядома, часам трэба абнаўляць і сімволіку ў дзяржустановах.

Колькі выдаткоўваюць на дзяржсімвалы цяпер? Паглядзелі кошты на “патрыятызм” чыноўнікаў.

Бюджэты на сцягі

Ваенны камісарыят Мінска ў пачатку красавіка закупіўся дзяржсімволікай, набыўшы дзве напольныя тумбы для флагштока, васямнаццаць дрэвак для сцягоў, пятнаццаць вулічных сцягоў розных памераў (1 на 2 метры і 75 сантыметраў на 1 метр) і адзін герб.

Агульная сума склала 2 549 рублёў, з якіх герб каштаваў — 80 рублёў, а сцягі з улікам дрэўка — 96,97 рублёў (вялікі) і 65,48 рублёў (маленькі).  

Круглянскі райвыканкам (Магілёўская вобласць) таксама закупіўся атрыбутамі беларускай дзяржаўнасці ў красавіку. У спіс увайшлі тры дзяржгербы і тры партрэты Аляксандра Лукашэнкі агульным коштам 563,82 рубля.

Герб круглянчан аказаўся даражэйшым, чым быў у мінскага камісарыята — 129,14 рубля. А адзін партрэт Лукашэнкі ацанілі ў 58,8 рубля.   

Райвыканкам Гарадка (Віцебская вобласць) урваў адзін дзяржсцяг, лічы, увогуле за капейкі. Ён абышоўся мясцовым чыноўнікам у 50 рублёў.

“Доўгі” і дарагі патрыятызм

А колькі ж каштуе гіганцкая расцяжка, якую з гонарам неслі чыноўнікі ў нядзелю? Тут ужо кошты ўзлятаюць у стратасферу.

Мінскі аблвыканкам у траўні закупіў такое палотнішча памерам 100 на 5 метраў за 22,440 рублёў. Атрымалася, што адзін метр квадратны такой расцяжкі абышоўся ў 45 рублёў бюджэтных грошай. 

Такія ж вялікія сцягі былі і ва ўсіх іншых абласцях, а ў Мінску даўжыня палатна ўвогуле склала 500 метраў. Яго цана невядомая, але калі падлічыць з улікам кошту абласнога, можа выйсці не нашмат меншай, чым 100 тысяч.