Міліцыя ў Баранавічах дэмантавала смешны дарожны знак

Мем выйшаў з-пад кантролю: ДАІ знайшла аўтараў забаўнага дарожнага знака ў Баранавічах.

Знак з жартоўным папярэджаннем "П'яныя людзі пераходзяць дарогу" з'явіўся ў мікрараёне Паўночны ў Баранавічах. Фота днямі завірусілася ў сацсетках, і ўвагу на яго звярнулі міліцыянты.

Яны выявілі, што знак стаяў на закрытай тэрыторыі аднаго з гаражных кааператываў, убаку ад праезнай часткі агульнага карыстання. Металічную стойку паставіў старшыня кааператыва па ўзгадненні з яго чальцамі. На стойцы замацавалі самаробны жартоўны знак, інфармацыйную таблічку і пудзіла па мянушцы "Байкер". У кааператыве гэтую кампазіцыю выкарыстоўвалі як мясцовую гумарыстычную славутасць, якая ніяк не замінала рэальнаму дарожнаму руху.

Аднак у ДАІ палічылі, што хоць аб'ект знаходзіцца на закрытым участку, але ўсталёўваць любыя самаробныя канструкцыі, якія імітуюць элементы дарожнага рэгулявання, недапушчальна.

Стойку разам з усімі элементамі дэмантавалі. А са старшынёй і чальцамі кааператыва правялі "падрабязную прафілактычную гутарку".