Дыверсанты з тэрыторыі Беларусі ва Украіну не ідуць — украінскія памежнікі

Дзяржаўная памежная служба Украіны не фіксуе выпадкаў, каб у краіну траплялі дыверсійна-разведвальныя групы з тэрыторыі Беларусі. Пра гэта 1 ліпеня журналістам паведаміў спікер украінскага ведамства Андрэй Дземчанка.

"Нейкіх нестандартных сітуацый або спробаў мерапрыемства ДРГ з тэрыторыі Беларусі няма. Нягледзячы на ціск Расіі Беларусь для сябе ясна разумее далейшыя рызыкі, калі баявыя дзеянні перакінуцца на яе мяжу", — прыводзіць яго словы інфармагенцтва "Укрінфарм".

Дземчанка сказаў, што рэтранслятары на тэрыторыі Беларусі, якія Расія выкарыстоўвае для запуску ўдарных дронаў па ўкраінскай тэрыторыі, цяпер выключаныя.

Аднак, дадаў ён, "у Беларусі працягваюць развіваць аб'екты ваеннай інфраструктуры, якія могуць быць перададзеныя ў карыстанне Расійскай Федэрацыі падчас разгортвання ваенных дзеянняў".

30 чэрвеня галоўнакамандуючы УСУ Аляксандр Сырскі заявіў, што Беларусь не дэмантавала рэтранслятары, але на нейкі час выключыла іх. Ён дадаў, што напярэдадні адзін рэтранслятар быў уключаны, "але, я думаю, больш яны іх уключаць не будуць".

Таксама Сырскі заявіў, што на цяперашні момант з беларускага боку ніякага назапашвання войскаў каля мяжы не назіраецца.