Прыватных коней дазволілі пакінуць у Ратамцы да 1 жніўня

Прыватныя коні могуць заставацца ў стайнях у Ратамцы да 1 жніўня. Пра гэта кіраўніцтва Рэспубліканскага цэнтра алімпійскай падрыхтоўкі (РЦАП) па конным спорце і конегадоўлі паведаміла ўладальнікам, даведалася выданне Onliner.

Раней кіраўніцтва патрабавала вывезці 90 коней да 1 ліпеня. Уладальнікам жывёлаў гэтае рашэнне паведамілі 26 чэрвеня. На вываз коней далі чатыры дні, два з якіх прыпалі на выходныя. У каментары дзяржаўным СМІ кіраўніцтва РЦАП заявіла, быццам ніхто з уладальнікаў своечасова не звярнуўся па падаўжэнне дамоваў, якія дзейнічалі па 1 ліпеня.

У каментары журналістам адна з уладальніц коней расказала, што яны заўсёды падпісвалі бестэрміновыя дамовы. На пачатку красавіка ўладальнікаў папрасілі перазаключыць дамовы, а ў дакуменце была пустой графа з датай дзеяння: "Спытала пра гэта, на што мне сказалі "потым дапішам". Я прапанавала ўпісаць самастойна і падоўжыць на стандартны тэрмін у год, але мне сказалі, што не трэба".

Праз месяц, у траўні, яна згадала, што не забрала свой асобнік дамовы. Але супрацоўніца РЦАП сказала, што іх яшчэ не падпісалі. Праз некалькі дзён у Ратамцы паднялі расцэнкі для ўтрымання коней — з 22 да 30 рублёў у суткі за жывёлу.

"Натуральна, людзі перапалохаліся. Літаральна праз паўгадзіны нам напісалі, што мы можам ісці і забіраць дамовы. Мы пайшлі і з вялікім здзіўленнем выявілі, што там стаіць дата [дзеяння] — да 1 ліпеня. Гэта значыць, у адзін дзень нас апавясцілі, што з 1 чэрвеня (праз 9 дзён) у нас падымаецца кошт, а дамова дзейнічае да 1 ліпеня", — дзеліцца падрабязнасцямі дзяўчына.

Яна кажа, што прыватныя ўладальнікі напісалі зварот да кіраўніцтва РЦАП з просьбай даць абгрунтаванне новых тарыфаў. Таксама яны звярнулі ўвагу на недахопы інфраструктуры, якія зніжаюць якасць абслугоўвання. Акрамя таго, у дакуменце гаварылася, што ўладальнікі хочуць працягнуць дамову арэнды, але просяць дадатковае пагадненне. Падпісаў гэты зварот 51 чалавек.

Дакумент адправілі 1 чэрвеня. 17 чэрвеня кіраўніцтва РЦАП паведаміла, што закон дазваляе даць адказ цягам месяца. А 26-га ўладальнікі ўжо атрымалі паведамленне пра высяленне. "Дакумент быў адпраўлены не ў пятніцу раніцай, не ў абед — ён быў дасланы за прыкладна паўгадзіны да канца працоўнага дня. Пакуль мы атрымалі, убачылі — затэлефанаваць ці прыйсці на месца ўжо не было магчымасці", — адзначае ўладальніца.

У панядзелак конеўладальнікі напісалі заявы на падаўжэнне дамоваў. І ўвечары ў аўторак ім прыйшло пісьмовае паведамленне, што дамовы на ранейшых умовах будуць дзейнічаць да 1 жніўня. Цягам ліпеня кіраўніцтва РЦАП абяцае развязаць праблему.