У першым паўгоддзі 2026-га заказы знізіліся на траціну — выдавецтва "Янушкевіч"

Продажы кніг падаюць, таму новых выданняў з'яўляецца ўсё менш. Выдавецтва "Янушкевіч" абвясціла, што зрабіла стаўку на распаўсюд ужо выдадзеных кніг, каб назапасіць сродкі на выданне новых. "Таму як ніколі мы выпусцілі мала новых пазіцый — толькі тры, і то дзве з іх без нашага фінансавага ўдзелу", — гаворыцца ў паведамленні выдавецтва ў сацсетках.

Разам з тым "Янушкевіч" кажа, што і кнігі іншых беларускіх выдавецтваў не дасягнулі вялікага фінансавага поспеху: "На жаль, у апошнія паўгода не выстраліла заўважным поспехам у продажах ніводная беларуская навінка — няважна, гэта пераклад, нон-фікшан ці арыгінальная проза. Як прыклад прывядзём "Атлант расправіў плечы" Айн Рэнд: за месяц продажаў пры інтэнсіўнай прамоцыі, пры цане, роўнай сабекошту, мы вярнулі толькі 8% укладзеных сродкаў. З навінкамі з іншых выдавецтваў падобная ж сітуацыя — продажы слабыя, выключэннем з'яўляецца хіба што 3 і 4 тамы "Silva Rerum" Крысціны Сабаляўскайце (выдавецтва "Вясна")".

Выдавецтва канстатуе зніжэнне чытацкай аўдыторыі і падзенне інтарэсу да кніг. Гэта, як адзначаецца, агульная тэндэнцыя крызісу ў беларускіх супольнасцях.

Таксама на падзенне продажаў паўплываў і "экстрэмісцкі" статус, які шэраг незалежных выдавецтваў атрымаў чатыры месяцы таму: "Гэта моцна б'е па ахопе аўдыторыі з Беларусі. Людзі баяцца, кнігаабарот падае".

Таксама ў выдавецтве прыводзяць статыстыку продажаў за першыя шэсць месяцаў 2026 года. Яна несуцяшальная: "За паўгода мы апрацавалі 2829 заказаў. Гэта на 28% менш, чым у другім паўгоддзі 2025 года (не будзем забываць, што восень-зіма — вельмі спрыяльныя перыяды ў продажах). Большасць — з Польшчы, на другім месцы — Германія, на трэцім — Літва".

Першая пяцёрка рэйтынгу продажаў выглядае так:

1. "Восень патрыярха" Габрыеля Гарсія Маркеса (342 асобнікі на суму 16 755 злотых); 
2. 3-і том "Silva Rerum" Крысціны Сабаляўскайце (164 ас. на суму 10 900 злотых);
3. 4-ы том "Silva Rerum" Крысціны Сабаляўскайце (157 ас. на суму 10 373 злотых);
4. "Сабакі Эўропы" Альгерда Бахарэвіча (154 ас. на суму 10 628 злотых);
5. 1-ы том "Silva Rerum" Крысціны Сабаляўскайце (151 ас. на суму 9832 злотых).