У Беларусі хочуць зняць кіно, як войска ў 2020 годзе рыхтавалася да агрэсіі NATO
Беларускія дэсантнікі, ілюстрацыйнае фота / t.me/brest38sso
Мінкульт хоча зняць ігравое кіно пра тое, як у 2020 годзе беларускае войска рыхтавалася адбіваць патэнцыйную агрэсію NATO.
Такая фармулёўка фігуруе ў спісе прыярытэтных тэмаў конкурсу сцэнароў да 110-га юбілею ўтварэння Узброеных сіл Беларусі, заўважыў тг-канал "Свяшчэнны Белавуд".
Цалкам спіс прыярытэтных тэмаў для напісання сцэнароў выглядае так:
— пераемнасць пакаленняў у абароне Айчыны ў розныя гістарычныя перыяды (Вялікая Айчынная вайна, выкананне інтэрнацыянальнага абавязку ў Афганістане, служба ў сучасных Узброеных Сілах Рэспублікі Беларусь);
— работа разлікаў, якія выконваюць задачы баявога дзяжурства па супрацьпаветранай абароне, па цэлях, што парушылі дзяржаўную мяжу ў паветранай прасторы Рэспублікі Беларусь;
— разгортванне групоўкі беларускага войска на заходніх рубяжах для прадухілення патэнцыйнай агрэсіі краін NATO ў 2020 годзе;
— выкананне задач падраздзяленнямі Узброеных Сіл Рэспублікі Беларусь па ўзмацненні аховы ўчасткаў дзяржаўнай мяжы;
— з'яўленне ў Беларусі сучасных комплексаў узбраення;
— дзейнасць вайскоўцаў 52-га асобнага спецыялізаванага пошукавага батальёна.
Матэрыялы на конкурс чакаюць 14 жніўня не пазней за 17:00. Вынікі конкурсу будуць падведзеныя да 1 верасня 2026 года.
