Экс-намеснік дырэктара разведкі Малдовы здаваў у КДБ імёны румынскіх разведчыкаў

Экс-намеснік дырэктара малдоўскай разведкі Аляксандру Балан здаваў у КДБ імёны румынскіх разведчыкаў. Ён ведаў асобы як мінімум сямі супрацоўнікаў румынскай службы разведкі, якія дзейнічалі пад прыкрыццём, перадае малдоўская служба Радыё Свабода.

Апошняя аперацыя Балана прайшла ў Будапешце ў красавіку 2025 года. Тады ж у Венгрыю прыехалі тры супрацоўнікі КДБ — Уладзімір Варажбітаў, Уладзімір Ярмак і Мікалай Дукшта. Іх імёны фігуруюць у крымінальнай справе Балана.

"Першыя двое маюць дыпламатычныя пашпарты, а трэці быў акрэдытаваны на пасадзе "дарадцы" ў амбасадзе Беларусі ў Празе і ў лістападзе 2024 года афіцыйна абвешчаны прадстаўніком беларускага КДБ", — адзначае Радыё Свабода. Раней паведамлялася, што ў верасні 2025-га Чэхія выслала беларускага дыпламата — мяркуецца, што гэта быў Дукшта.

9 красавіка супрацоўнікі КДБ прыбылі да комплексу, дзе пражываў Балан, але ўсярэдзіну зайшоў толькі Варажбітаў. Ён заставаўся ў будынку амаль 11 гадзін. У той дзень Балан атрымаў на тэлефон 512 паведамленняў у Telegram, Signal, WhatsApp і Facebook. Свой мабільны Балан уключыў толькі каля паўночы і адправіў у Signal паведамленне кантакту Prod — у ім было толькі эмодзі.

У наступныя дні Балан 36 разоў падключаўся ў Будапешце да публічнага Wi-Fi, хаця меў мабільны інтэрнэт.

Пасля сустрэч з супрацоўнікамі КДБ ён абмяняў у абменніку спачатку 1500 еўра, а праз пару дзён — яшчэ 1400 еўра і вылецеў у Брусель. Афіцэры КДБ адправіліся з Венгрыі ў Аўстрыю.

Пасля арышту Балана сярод яго файлаў знайшлі ў тым ліку дакумент "Супрацоўнікі SRI 2013" з фотаздымкамі сямі супрацоўнікаў SRI пад прыкрыццём. Іх імёны не пазначаныя, але з судовых матэрыялаў вынікае, што Балан ведаў іх асобы.

Балана ў красавіку 2026-га перадалі ў Беларусь у рамках абмену, калі ў Польшчу перадалі Анджэя Пачобута.

Як адзначае newsmaker.md, 23 чэрвеня прэзідэнт Малдовы Мая Санду пазбавіла Балана малдоўскага грамадзянства.