У Беларусь перадалі расійскага археолага Буцягіна і малдоўскага шпіёна Балана

Падчас сённяшняга абмену "пяць на пяць" рэжым Лукашэнкі акрамя Анджэя Пачобута перадаў двух грамадзян Польшчы і двух — Малдовы.

Грамадзяне Малдовы, якіх вызвалілі 28 красавіка, — супрацоўнікі Службы інфармацыі і бяспекі. Іх абмянялі на грамадзянку Расіі Ніну Папову і грамадзяніна Малдовы Аляксандру Балана. Балан — адзін з кіраўнікоў разведкі Малдовы, які перадаваў інфармацыю беларускаму КДБ. Яго затрымалі ў Румыніі, абвінавацілі ў шпіянажы і дзяржаўнай здрадзе.

"Для нашай краіны гэта перамога, якую нельга вымераць простай матэматычнай формулай: мы вярнулі дадому двух грамадзян, якія працуюць на Рэспубліку Малдова, адмовіўшыся ўзамен ад двух зняволеных, якія працавалі супраць Рэспублікі Малдова", — заявіла прэзідэнтка Малдовы Мая Санду.

Сярод іншых абмененых на карысць Расіі — расійскі археолаг Аляксандр Буцягін, затрыманы ў Польшчы па запыце Украіны. Афіцыйны Кіеў абвясціў яго ў міжнародны вышук за незаконныя археалагічныя раскопкі ў Крыме.

Сярод вызваленых у Беларусі грамадзянаў Польшчы — манах-кармеліт Гжэгаж Гавел.