ЕС заклікае Беларусь вярнуць усіх незаконна затрыманых і дэпартаваных украінцаў
Сцягі Украіны і Еўрасаюза / pixabay.com
Украіна і вярхоўны прадстаўнік Еўрасаюза звярнуліся да Расіі і Беларусі з сумеснай заявай. Яны заклікаюць вярнуць ва Украіну ўсіх адвольна затрыманых і незаконна дэпартаваных украінскіх грамадзян, у тым ліку дзяцей.
"Мы настойліва заклікаем Расію і Беларусь забяспечыць неадкладнае, бяспечнае і безумоўнае вяртанне ва Украіну ўсіх адвольна затрыманых, незаконна дэпартаваных і гвалтоўна перамешчаных украінскіх грамадзянскіх асоб, уключаючы дзяцей", — гаворыцца ў дакуменце.
ЕС і Украіна заклікаюць даць Міжнароднаму камітэту Чырвонага Крыжа доступ да ўсіх месцаў утрымання ўкраінскіх ваеннапалонных і затрыманых грамадзянскіх асоб. Таксама яны заклікаюць дапамагчы высветліць лёс і месцазнаходжанне асоб, якія лічацца зніклымі без вестак.
"Мы зноў заклікаем выконваць нормы міжнароднага гуманітарнага права і міжнароднага права ў галіне правоў чалавека ў дачыненні да ўсіх зняволеных, уключаючы спыненне жорсткіх пакаранняў смерцю і прымянення катаванняў у дачыненні да ваеннапалонных і затрыманых грамадзянскіх асоб", — падкрэсліваецца ў заяве.
