Стала вядома пра катаванні экс-выкладчыка БДУ, асуджанага ў Азербайджане
Ігбал Абілаў і яго навуковая кіраўніца Роза Турарбекава / Meydan TV
Экс-выкладчыка Белдзяржуніверсітэта Ігбала Абілава катавалі ў турме ў Баку. Пра гэта журналістам Toplum TV расказаў яго бацька Шахін Абілаў.
Ігбал Абілаў — даследчык талышскай культуры. Ён грамадзянін Азербайджана, але з сямі гадоў жыў у Беларусі, скончыў БДУ і выкладаў у гэтым жа ўніверсітэце. Яго стрыечны брат — стэндапер Ідрак Мірзалізадэ.
Абілава затрымалі ў 2024 годзе, калі ён прыехаў на вяселле сваяка. Навукоўца абвінавацілі ў дзяржаўнай здрадзе і ўзбуджэнні нацыянальнай варожасці. Яго родныя лічаць, што сапраўднай прычынай пераследу з'яўляецца захаванне талышскай ідэнтычнасці і вывучэнне яе.
Як расказаў бацька, Ігбала адправілі ў штрафную камеру, дзе рукі прывязалі да жалезнага ложка. У вязня былі сінякі і траўмы. 9 ліпеня ў іх мусіла адбыцца спатканне, але на сустрэчу з палітвязнем не дапусцілі ні бацькоў, ні адвакатаў. "Сёння стала зразумела, што майго сына катавалі", — заявіў Шахін Агбілаў 13 ліпеня.
