У Офісе Ціханоўскай пракаментавалі выпадкі адмоў беларусам у статусе ўцекачоў у Польшчы

Юрыдычная служба Офіса Святланы Ціханоўскай (ОСЦ) не бачыць змен у падыходах польскай дзяржавы да выдачы беларускім эмігрантам статусу ўцекача. 

Такі каментарый Еўрарадыё атрымала ў адказ на афіцыйны запыт пасля артыкула, апублікаванага на мінулым тыдні. У ім мы апісалі выпадкі беларусаў, Ілоны і Івана (імёны зменены), якім адмовілі ў міжнароднай абароне. 

Падставай для рашэння стала выснова інспектараў Упраўлення па справах замежнікаў Варшавы, што заяўнікам не пагражае болей небяспека ў Беларусі праз іх палітычную актыўнасць у 2020 годзе.

Прадстаўнікі беларускіх дэмсіл распавялі, што ім вядома як мінімум пра адзін такі нядаўні выпадак. 

“Разам з тым падобныя рашэнні выносіліся і раней, у тым ліку некалькі гадоў таму, аднак яны не насілі сістэмнага характару і хутчэй былі выключэннем. Важна таксама адзначыць, што ў Польшчы дзейнічае незалежная судовая сістэма, і беларусы неаднаразова паспяхова абскарджвалі адмовы, атрымліваючы міжнародную абарону пасля судовага разгляду”.

Юрыдычная каманда Офіса перыядычна атрымлівае звароты ад грамадзян Беларусі па пытаннях міжнароднай абароны і міграцыйных працэдур. Ад праваабарончых арганізацый спецыяльных зваротаў менавіта па гэтай праблематыцы яны не атрымлівалі.

“На дадзены момант мы не бачым падстаў казаць пра змяненне агульнага падыходу польскіх улад. Хутчэй гаворка ідзе пра асобныя рашэнні, якія могуць быць звязаны з ацэнкай канкрэтных абставін справы або чалавечым фактарам. Пры гэтым агульная сітуацыя з правамі чалавека ў Беларусі не палепшылася, а рэпрэсіі працягваюцца”, — падкрэслілі юрысты з ОСЦ.