Гомельскім дрэвам сталі ставіць "кропельніцы"

Незвычайныя канструкцыі на старых дрэвах заўважылі наведвальнікі палацава-паркавага ансамбля Румянцавых і Паскевічаў у Гомелі. Збоку гэтыя прылады нагадваюць звычайныя медыцынскія кропельніцы, піша выданне "Штодзень".

Высветлілася, што гаворка ідзе пра сучасную сістэму ін’екцый у ствол дрэва. Праз спецыяльныя штуцары ў сасудзістую сістэму дрэваў паступова ўводзяцца прэпараты, якія дапамагаюць раслінам змагацца з хваробамі, шкоднікамі або пераносіць стрэсавыя ўмовы, у тым ліку працяглую спёку.

Такі спосаб лічыцца больш экалагічным за традыцыйнае апырскванне: дзякуючы ін'екцыям рэчывы трапляюць непасрэдна ў дрэва і амаль не распаўсюджваюцца ў навакольным асяроддзі.

Для Беларусі, якая гэтым летам перажывае анамальную спёку, такая падтрымка дрэваў з'яўляецца асабліва актуальнай.