Групавое пахаванне дзяцей Х стагоддзя знайшлі ў кургане на Кругляншчыне

Вялікія археалагічныя раскопкі праводзяць археолагі Нацыянальнай акадэміі навук разам са студэнтамі Магілёўскага дзяржуніверсітэта на курганах каля вёскі Азёры Круглянскага раёна.

Цяпер навукоўцы даследуюць самы вялікі з курганоў: яго вышыня дасягала 6 м, а дыяметр - каля 30 м. Ён самы вялікі ва ўсёй Магілёўскай вобласці. За час працы адкрылі пласт у 4 метры.

Падчас раскопак выявілі ўнікальныя знаходкі: фрагменты жаночых упрыгажэнняў са шкла і косці, посуд, наканечнікі стрэл. Усё гэта клалі разам з нябожчыкамі, каб у замагільным свеце яны ні ў чым не мелі патрэбу, кажа ў каментары БЕЛТА загадчык Цэнтра археалогіі Беларусі Інстытута гісторыі НАН Аляксей Аўласовіч. Пахаванні датуюць сярэдзінай — другой паловай Х стагоддзя.

"Толькі ў адным сектары мы выявілі чатыры пахаванні па абрадзе крэмацыі, і тут ёсць больш позняе падзахаванне — знайшлі пяць дзіцячых касцякоў. Мабыць, была нейкая эпідэмія або дзеці былі нехрышчоныя, таму іх пахавалі не на могілках, а ў кургане", — дзеліцца падрабязнасцямі Аўласовіч.

Археолаг кажа, што пахаванне зрабілі данскія славяне — продкі вядомых нам летапісных радзімічаў. Ён дадае, што пакуль не ўдалося знайсці галоўнае пахаванне: "Такую масу зямлі маглі насыпаць альбо для вельмі вялікай колькасці пахаванняў, альбо для нейкай дамінанты. Дзяжурная версія, якую трэба будзе альбо пацвердзіць, альбо абвергнуць, што ў гэтым кургане можа быць пахаванне племяннога правадыра. Студэнты жартам называюць гэты курган "Радзімаў курган", мяркуючы, што тут пахаваны сам летапісны Радзім".