На вялікіх нямецкіх могілках у Рагачоўскім раёне зніклі крыжы

На могілках нямецкіх салдатаў каля вёскі Хадасовічы Рагачоўскага раёна зніклі надмагіллі і крыжы. Гэта тэрыторыя з ахоўнай зонай каля 1325 кв. м з магіламі ў выглядзе пагоркаў. Там пахаваныя прыкладна 380 немцаў, якія загінулі на тэрыторыі Беларусі падчас Другой сусветнай вайны. Аб'ект мае статус афіцыйнага пахавання замежных вайскоўцаў.

Адсутнасць крыжоў на могілках заўважыла выданне "Флагшток". Выявілася, што зніклі яны яшчэ некалькі гадоў таму. На фота ў Google.Maps з 2021 года відаць, што крыжы яшчэ былі, хаця многія з іх паваленыя.

У сельсавеце заявілі, што могілкі не стаяць у іх на балансе, таму мясцовыя органы адказнасці не нясуць і не ведаюць, што адбылося. У аддзеле ідэалагічнай работы райвыканкама пасля шэрагу ўзгадненняў сказалі, што не могуць даваць інфармацыю па тэлефоне.

Разгадку журналісты знайшлі ў каментарах і фота на форумах і анлайн-картах. Карыстальнікі кажуць, што крыжы згнілі, таму іх прыбралі: "Шмат крыжоў павалілася, дрэва згніла ля зямлі. Вялікі крыж хтосьці падняў і ўкапаў зноў".

На фота 2022 года ў Яндэкс.Картах крыжоў на магілах ужо няма. Затое можна пабачыць шыльдачку па-нямецку і па-руску. Там паведамляецца, што "ў мэтах забеспячэння бяспекі перамяшчэння былі выдаленыя старыя пашкоджаныя надмагіллі". Таксама на шыльдзе гаворыцца, што "далейшыя меры па ўтрыманні пахавання запланаваныя".

Унізе шыльды можна разабраць лагатып і назву нямецкай арганізацыі Volksbund Deutsche Kriegsgräberfürsorge e. V. (Народны саюз Германіі па догляду за ваеннымі пахаваннямі). Аднак на сайце гэтай арганізацыі і яе старонках у сацсетках журналісты не знайшлі свежых згадак могілак у Хадасовічах.

У 2011 годзе шэфства над могілкамі брала грамадская арганізацыя "Памяць".