У Гомельскай вобласці выяўлены рэшткі невядомага ўмацавання часоў ВКЛ

Археолагі Інстытута гісторыі НАН Беларусі выявілі ў вёсцы Антонава Нараўлянскага раёна Гомельскай вобласці цагляныя канструкцыі раней не апісаных навукай абарончых пабудоў XVI–XVII стагоддзяў. Пра гэта паведаміў вядучы навуковы супрацоўнік Алег Дэрновіч.

Гаворка ідзе пра канструкцыі ўмацаванага двара, або замка, старосты аршанскага і вядомага палеміста Філона Кміты-Чарнабыльскага і яго зяця, двараніна гаспадарскага Лукаша Сапегі. 

На першай адносна падрабязнай Радзівілаўскай карце 1613 года Антонава пазначана як "pagus cum domo nobilis" — "сяло з домам дваранына", а для яго ўмоўнага абазначэння выкарыстаны сімвал абарончай вежы.

Па словах Алега Дзярновіча, падчас даследавання, меркавана, былі выяўлены канструкцыі фундамента абарончай вежы, якая ўзвышалася над ракой Славечнай і згадваецца ў інвентары 1628 года. Для будаўніцтва вежы выкарыстоўваўся распаўсюджаная ў той час цэгла-пальчатка з характэрнымі барознамі на паверхні.

Помнік гісторыі падмывае рака Славечна, якая раней абараняла замак. Значная частка ўзгорку з пабудовамі ўжо апынулася ў рацэ. 

Разам з гэтым матэрыялам на беразе і ў вадзе выяўлена значная колькасць дэкаратыўна-архітэктурнай керамікі канца XVI — пачатку XVII стагоддзя.

Падчас экспедыцыі таксама былі выяўлены рэшткі абарончага валу. Сам умацаваны двор і сяло Антонава былі разбураны, меркавана, падчас рэйдаў казацкіх атрадаў у сярэдзіне XVII стагоддзя.