Рабро вагой 3 кг — у Гомелі знайшлі косткі дагістарычных жывёл
У Сажы знайшлі косткі дагістарычных жывёлаў / times.by
Гомельскія ратавальнікі з АСВОДа ў Сажы знайшлі косткі дагістарычных жывёлаў. Здарылася гэта падчас трэніровачнага апускання.
"Не скажу, каб здзівіўся. Пару гадоў таму прыблізна ў гэтым месцы мы з калегам паднялі чэрап бізона, а год таму я дастаў са дна Сажа частку пазваночніка маманта", — расказаў ратавальнік Сцяпан Жукавец у каментары выданню times.by.
Па дапамогу ў вызначэнні знаходак ратавальнікі звярнуліся да археолагаў палацава-паркавага ансамбля Румянцавых і Паскевічаў.
"На фота я бачу паяснічны пазванок і рабро маманта, а таксама перадплечча бізона. Абломак справа падобны на фрагмент сківіцы маманта", — пракаментаваў дасланае фота загадчык аддзела археалогіі і аховы гісторыка-культурнай спадчыны Юрый Панкоў.
Самая вялікая з шасці знаходак — рабро, яно важыць каля 3 кг.
У каментары журналістам Юрый Панкоў дадаў, што знаходкі цікавыя, але не ўнікальныя. Імі плануецца папоўніць фонды музея.
Месца, дзе ратавальнікі перыядычна падымаюць са дна ракі косці, мяжуе з урочышчам Шведская Горка. Там сустракаецца багата такіх знаходак. Раней тут ужо знаходзілі косткі ляснога слана, шарсцістых мамантаў, насарогаў, паўночных аленяў і нават пячорнага льва.
