Кіберы высветлілі, што Мельнікава сапраўды знаходзіцца ў Беларусі са сваімі дочкамі і мае пашпарт прыкрыцця на імя Ангеліны Радзівонавай. Пад гэтым псеўданімам яна набыла кватэру на вуліцы Пятра Мсціслаўца — пра гэта раней пісала выданне “Зеркало”.
Мельнікава была таксама фармальнай кіраўніцай фонду Białoruś Liberty, праз які “Кіберпартызаны” і Каардынайцыная рада атрымлівалі фінансаванне. Менавіта з рахунку арганізацыі Анжаліка перавяла каля 150 тысяч долараў на ўласны акаўнт.
Пакуль немагчыма высветліць, дзе працуе Мельнікава ў Беларусі і куды яна ездзіла за апошні год. Але “Кіберпартызанам” стала вядома, што ў студзені 2022-га Мельнікава пабывала ў Беларусі. НАУ афіцыйна аб’явіла пра яе далучэнне да каманды ў чэрвені 2024 года. Неўзабаве Мельнікава трапіла і ў КР.
— 14 студзеня 2022 года — гэта апошняя дата, калі яна пакінула Беларусь. На жаль, даты заезду мы не ведаем. То-бок мы ўстанавілі, што яна ўвогуле туды ездзіла пасля 2020 года. Можа, былі і іншыя паездкі, але мы пра іх не ведаем. І пра мэты гэтых яе паездак мы таксама не ведаем.
У расследаванні кіберы звяртаюць увагу на тое, што муж Мельнікавай Андрэй па-ранейшаму ездзіць паміж Беларуссю і Польшчай. Але ў польскія службы з пытаннем па ім хактывісты не звярталіся.
