Анжаліка Мельнікава жыве ў Мінску разам з дзвюма дочкамі — Кіберпартызаны

Анжаліка Мельнікава сапраўды жыве ў Мінску разам з дзвюма дочкамі. Пра гэта заяўляюць у сваім расследванні Кіберпартызаны.

Ёй належыць кватэра на вуліцы Пятра Мсціслаўца, пра якую раней пісалі ў СМІ. Да таго ж зніклая спікерка Каардынацыйнай рады часам карыстаецца пашпартам на імя Ангеліны Радзівонавай, каб хаваць сваю сапраўдную асобу.

"Мы ўстанавілі факт таго, што Мельнікава сапраўды жывая і пастаянна жыве ў Мінску. Наяўнасць пашпарта прыкрыцця дазваляе зрабіць выснову, што незалежна ад матываў такога ўчынку яна пайшла на супрацоўніцтва з КДБ", — пішуць Кіберпартызаны.

Расследвальнікі падкрэсліваюць, што дагэтуль застаюцца незразумелымі прычыны, па якіх Мельнікава пайшла на здзелку з КДБ. Аднак яе муж (ці былы муж) Андрэй Мельнікаў па-ранейшаму ездзіць паміж Беларуссю і Польшчай.

Анжаліка Мельнікава, якая з'яўлялася спікеркай Каардынацыйнай рады, знікла з Польшчы ў сакавіку 2025 года. Яе знікненне заставалася нявытлумачаным, пакуль СМІ не заўважылі яе ў Мінску.