Колькасць беларусаў у Літве працягвае скарачацца
Літва, ілюстрацыйнае фота / Еўрарадыё
У Літве працягвае змяншацца колькасць беларусаў, якія афіцыйна пражываюць у краіне. Адпаведную статыстыку падаў мясцовы Дэпартамент міграцыі.
Ад 1 студзеня да 1 чэрвеня 2026 года колькасць грамадзян Беларусі з ДНЖ Літвы скарацілася на 1360 чалавек. Цяпер у Літве пражываюць 48 926 нашых суайчыннікаў.
Па велічыні беларуская дыяспара з'яўляецца другой у Літве. Першае месца займаюць украінцы (больш за 78 тысяч), трэцяе — рускія (звыш 13 тысяч).
Дарэчы, на пачатку 2020 года ў Літве жылі 17 769 беларусаў. Іх колькасць стала імкліва павялічвацца ў сувязі з палітычнымі рэпрэсіямі пасля прэзідэнцкіх выбараў 2020 года. Найбольшая колькасць беларусаў у Літве была ў 2024 годзе — больш за 62 тысячы чалавек. Пазней Літва пачала прызнаваць пагрозай нацбяспекі тых беларусаў, якія служылі ў войску ці працавалі ў дзяржструктурах.
