143 беларусы атрымалі ў Польшчы статус уцекача за чатыры месяцы 2026-га
Польскі праязны дакумент замежніка і беларускі пашпарт / MOST
За студзень-красавік 2026 года статус уцекача ў Польшчы атрымалі не менш за 143 беларусы. Пра гэта сведчаць даныя Упраўлення па справах замежнікаў. Амаль столькі ж нашых суайчыннікаў атрымалі такі статус за ўвесь 2025 год — 147 чалавек.
У статыстыцы Упраўлення па справах замежнікаў ўлічваецца колькасць рашэнняў па заявах беларусаў. Але ў адной заяве могуць фігураваць некалькі чалавек.
Вялікая колькасць новых уцекачоў можа тлумачыцца тым, што пад канец 2025-га ў Польшчу трапіла вялікая група дэпартаваных з Беларусі палітвязняў. Сёлета яны праходзяць (ці ўжо прайшлі) працэс атрымання міжнароднай абароны.
Ад 2022 года статус уцекача ў Польшчы атрымалі амаль 1000 грамадзян Беларусі.
Таксама за першыя чатыры месяцы 2026 года 354 беларусы атрымалі ў Польшчы дадатковую міжнародную абарону. Адмовы ў міжнароднай абароне атрымалі 14 чалавек, яшчэ 79 спраў былі прыпыненыя.
