Беларусы, якія легальна знаходзяцца ва Украіне, не мусяць мець праблем з рахункамі
Яраслаў Чарнагор сустракае Святлану Ціханоўскую ў Кіеве / прэс-служба Ціханоўскай
Беларусы, якія легальна знаходзяцца ва Украіне, не павінны мець праблем з доступам да ўласных фінансавых сродкаў. Такую пазіцыю выказаў украінскі амбасадар, адказны за працу з беларускімі дэмсіламі, Яраслаў Чарнагор у інтэрв'ю выданню "Апостраф".
Беларусы ва Украіне нярэдка скардзяцца на тое, што ім блакуюць банкаўскія рахункі ці не дазваляюць іх адкрыць.
"Рахункі разблакоўваюцца і адкрываюць, калі ў вас, напрыклад, ёсць ваенны білет. Вам тады адкрыюць рахунак. Або калі ёсць від на пастаяннае або часовае пражыванне. Доказ таго, што вы знаходзіцеся на тэрыторыі Украіны легальна. Трэба прайсці некаторыя працэдуры, праверкі", — пракаментаваў Чарнагор.
Ён тлумачыць, што меры перасцярогі прынятыя для таго, каб прадухіліць пераход сродкаў украінцаў "у рукі агрэсара ці суагрэсара".
Журналіст выдання пацікавіўся, ці можна развязаць гэтую праблему на заканадаўчым узроўні.
"Гэта не задача МЗС, але мы будзем гаварыць з нардэпамі. Яны гэтае пытанне таксама вывучаюць. Залежыць таксама ад пазіцыі Нацбанка. Шмат узроўняў мае гэтае пытанне. У тым ліку і ўзровень урада", — адказаў дыпламат.
