Толькі 11% літоўцаў лічаць, што санкцыі супраць Беларусі трэба адмяніць

Больш як кожны трэці жыхар Літвы выступае за змякчэнне часткі санкцый супраць беларускіх уладаў, і амаль столькі ж лічаць, што бягучую палітыку варта захаваць. Гэта паказалі вынікі апытання насельніцтва, якое правяла кампанія "Baltijos tyrimai" па запыце LRT. 

Меркаванні літоўцаў наконт санкцый у дачыненні да Беларусі падзяліліся амаль пароўну. 35% выступаюць за іх змякчэнне і дыялог, 30% — за захаванне цяперашняй палітыкі, а 17% — за ўзмацненне абмежаванняў. Толькі 11% лічаць, што санкцыі трэба цалкам адмяніць.

Апытанне таксама паказала, што стаўленне да Беларусі звязана з палітычнымі поглядамі: рэспандэнты левых палітычных поглядаў часцей выступаюць за змякчэнне санкцый, аналагічную пазіцыю часцей займаюць і пажылыя жыхары.

Дацэнт Інстытута міжнародных адносін і палітычных навук Віленскага ўніверсітэта Віціс Юрконіс пракаментаваў для LRT, што меркаванне грамадства пра Беларусь фарміруецца пад уплывам публічнай прасторы, а таксама выказванняў палітыкаў і службовых асоб. 

— Не сакрэт, што ў самой Літве ёсць тыя, хто імкнецца змяніць санкцыйную палітыку, называючы яе нібыта неэфектыўнай, вычарпанай і такой, што не аказвае рэальнага ўздзеяння. Частка такіх выказванняў — гэта звычайныя штампы, іншая частка — выяўленне агульнай стомленасці ад вайны і напружанасці, — сказаў Юрконіс.

Па яго словах, у выніках апытання можна таксама ўбачыць "мэтанакіраваныя спробы" змяніць палітыку Літвы ў адпаведнасці з пэўнымі інтарэсамі. Ён згадаў і "спробы схавацца за амерыканскай спінай". Пра тое, што Літва адчувае ціск з боку ЗША, у гэтым месяцы казаў міністр замежных спраў Кястуціс Будрыс.

На думку эксперта, на практыцы няма падстаў для змякчэння санкцый, паколькі рэжым не змяніўся. Аналагічную пазіцыю на мінулым тыдні ў Вільні агучыла і старшыня Еўрапейскай камісіі Урсула фон дэр Ляен.