Крама з нацыянальным каларытам закрылася пасля затрымання ўладальніка — "Вясна"

За апошні тыдзень пра сваё закрыццё абвясцілі тры вядомыя беларускія брэнды адзення і этна-тавараў — Honar, LSTR і Ragna. Каманды гэтых праектаў афіцыйна не каментавалі прычыны закрыцця.

Як даведаліся ў праваабарончым цэнтры "Вясна", сілавікі затрымлівалі ўладальніка адной з крамаў. Яго дапытвалі наконт ягоных сацсетак і кантактаў. Ад яго запатрабавалі закрыць бізнес, пасля чаго адпусцілі.

Старшыня ПЦ "Вясна" і лаўрэат Нобелеўскай прэміі міру Алесь Бяляцкі ацаніў гэтыя дзеянні як чарговы крок па русіфікацыі Беларусі: "Гэта сумныя і трывожныя звесткі, якія паказваюць, што наступ на беларускую культуру працягваецца ва ўсіх праяўленнях. Гэтым разам чарга дайшла да нацыянальнага адзення і сімволікі. У гэты ж час працягваюць знішчацца беларускія кнігарні і выдавецтвы, беларускія кніжкі пастаянна ўносяцца ў экстрэмісцкія спісы — яны фактычна забароненыя на тэрыторыі Беларусі. Цяпер справа дайшла да адзення і прыкладнога мастацтва".

Бяляцкі мяркуе, што ў такіх умовах варта супраціўляцца і бараніць сваё ўсімі магчымымі формамі.