Крысціна Ціманоўская заваявала два "срэбра" на чэмпіянаце Польшчы

Крысціна Ціманоўская заваявала два "срэбра" на чэмпіянаце Польшчы па лёгкай атлетыцы. Беларуская бягуха стала другой на дыстанцыях у 100 і ў 200 метраў.

"Я ведаю, што фізічна я добра падрыхтаваная. Але баялася рызыкаваць у фінале і бегчы хутчэй. Але ў гэтым сезоне ў мяне будзе яшчэ некалькі спробаў пераадолець адзнаку ў 23 секунды, — расказвае Ціманоўская пра забег на 200 метраў, які скончыла з вынікам 23,09 секунды. — Пакуль што я сканцэнтраваная на падрыхтоўцы да чэмпіянату Еўропы ў бегу на 100 метраў і эстафеце".

Крысціна Ціманоўская — беларуская спрынтарка, якая выступае за зборную Польшчы. На Алімпіядзе ў Токіа ў 2021 годзе беларускія спартовыя чыноўнікі паспрабавалі прымусова адправіць Ціманоўскую ў Беларусь пасля таго, як яна раскрытыкавала трэнерскі штаб. Бягуха адмовілася садзіцца ў самалёт, звярнулася да японскай паліцыі і атрымала гуманітарную візу Польшчы. У 2022 годзе ёй надалі польскае грамадзянства, а са жніўня 2023-га яна атрымала права прадстаўляць Польшчу на міжнародных спаборніцтвах.

Асабістыя рэкорды Ціманоўскай — 11,04 секунды на дыстанцыі 100 метраў і 22,75 секунды на 200 метраў.