МТС абвясціў тэндар на аднаўленне вышкі — якраз там, дзе, імаверна, знішчылі рэтранслятар
Базавая станцыя ў Тонежы / "Флагшток"
Пасля паведамлення пра знішчэнне расійскага рэтранслятара на тэрыторыі Беларусі МТС абвясціў тэндар на аднаўленне інфраструктуры на Палессі. Будаўніча-мантажныя працы патрабуюцца на вышцы сотавай сувязі №1499 у Гомельскай вобласці.
Як высветлілі журналісты выдання "Флагшток", яна размешчаная каля Дома культуры ў цэнтры вёскі Тонеж Лельчыцкага раёна. У дакументацыі не ўказана, якія менавіта пашкоджанні атрымала базавая станцыя. Аднак да яе прыкладзены поўны камплект чарцяжоў металаканструкцый і электратэхнічнага абсталявання.
5-га ліпеня беларускае выданне This Minsk Media паведаміла пра ўкраінскі ўдар па вышцы пад Лельчыцамі. Журналісты спасылаліся на неназваную крыніцу. І ўдакладнялі, што пасля першай атакі пачаўся пажар.
"З першага разу не патрапілі — пасля падзення дрона пачаўся лясны пажар. Калі прыехалі яго тушыць, сталі сведкамі другой спробы: прыляцела проста ў вышку. Мясцовым жыхарам строга забаранілі казаць пра здарэнне і нават выходзіць з дамоў. Але тут усе ўсё ведаюць", — расказаў адзін з суразмоўцаў This Minsk Media.
Сэрвіс FIRMS, які фіксуе лясныя пажары, паказвае, што ўдзень 28-га чэрвеня прыкладна за 3 км ад тонежскай базавай станцыі МТС было зарэгістраванае ўзгаранне.
На наступны дзень украінскі вайсковы аналітык Іван Ступак у стрыме Еўрарадыё расказаў, што "тры [расійскія] рэтранслятары [на тэрыторыі Беларусі] былі выведзеныя са строю ў выніку ўкраінскіх дзеянняў. А чацвёрты перастаў працаваць, скажам так, з добрай волі Рэспублікі Беларусь".
