Экс-палітзняволеныя Дуліна і Калеснікава завочна паспрачаліся пра дыялог з Лукашэнкам

Былыя палітзняволеныя Марыя Калеснікава і Наталля Дуліна ў сацсетках завочна паспрачаліся пра дыялог з Лукашэнкам. Яны дэманструюць супрацьлеглае бачанне сітуацыі.

Марыя Калеснікава ў прамове на адкрыцці Зальцбургскага фестывалю выступае за тое, каб весці з рэжымам "чыста прагматычную камунікацыю з яснымі мэтамі". Адна з якіх — як мага хутчэйшае вызваленне з-за кратаў людзей, асуджаных па палітычных матывах.

Таксама яна заклікае як мага хутчэй адкрыць Еўрасаюз для беларусаў: "Калі людзі не могуць паехаць у Еўропу, яны едуць у Расію".

Наталля Дуліна "таксама за тое, каб ратаваць людзей. Але ж ратаваць трэба не толькі тых, хто ў калоніях. Ратаваць трэба ўсіх, хто сядзіць у турме, імя якой — Беларусь".

Яна звяртае ўвагу на тое, што палітвязні, выйшаўшы на волю, часта пазбаўляюцца правоў: не могуць знайсці працу, адкрыць рахунак у банку, падключыць тэлефон на сваё імя. Шмат каго ўвогуле выкідаюць з краіны і скасоўваюць пашпарты. То бок, у выніку саступак Лукашэнку людзей вызваляюць — але істотна ўскладняюць жыццё на свабодзе.

"А давайце зменім ракурс. Ці вам не здаецца, што ідучы на ​​саступкі — а па-іншаму вы не дамовіцеся з Лукашэнкам, каб ён адпусціў людзей, — вы абясцэньваеце іх учынкі, іх выбар, іх ахвяру? — піша Дуліна. — У сацсетках здзіўляюцца: як жа так, самі былыя палітвязні выступаюць за ціск на рэжым і не ірвуцца вызваляць астатніх. Дзіўна?

Задумайцеся: Алесь Бяляцкі, які мае вялізны досвед рэпрэсій з боку рэжыму, выступае за непрымірымае ўзмацненне санкцый. Напэўна, гэта не проста так".