36 гадоў таму была прынятая дэкларацыя аб дзяржаўным суверэнітэце Беларусі
Святкаванне 27 ліпеня / архіўнае фота
36 гадоў таму, 27 ліпеня 1990 года, Вярхоўны Савет БССР прыняў дэкларацыю "Аб дзяржаўным сувэрэнітэце".
Да 1996-га ў гэты дзень адзначалася галоўнае дзяржаўнае свята — Дзень Незалежнасці. Пасля рэферэндуму, праведзенага ў лістападзе 1996-га, дату перанеслі на 3 ліпеня — дзень вызвалення Мінска ад гітлераўцаў.
Каментуючы гэтую дату, Святлана Ціханоўская нагадала, што за прыняццем Дэкларацыі аб суверэнітэце стаяць людзі, якія хацелі, каб Беларусь нарэшце сама вырашала свой лёс.
"Гэта быў вынік прабуджэння. Пасля Чарнобыля, пасля адкрыцця праўды пра Курапаты, пасля рухаў за свабоду ў суседніх краінах усё больш беларусы адчувалі: мы маем права быць асобнай краінай. Мае права існаваць Беларусь, і не як дадатак да чужой імперыі, а як дом для свайго народа.
Незалежнасць не з’явілася сама па сабе — за яе змагаліся, яе выбіралі і адстойвалі. Нават тыя, хто пазней пачаў разбураць беларускую дзяржаўнасць, тады галасавалі за суверэнітэт, нейтралітэт і бяз’ядзерны статус", — падкрэсліла лідарка беларускіх дэмакратычных сілаў.
Яна дадала, што гэтая дата важная для сучаснасці, "бо Беларусь павінна быць самастойнай, мірнай і вольнай ад чужой зброі ды чужых войнаў".
