Мілінкевіч: Выбары адзінага нагадваюць мне конкурс прыгажосці

Спробы абраць адзіна кандыдата ад апазіцыі для ўдзелу ў прэзідэнцкіх выбарах лідэр руху “За свабоду!” Аляксандр Мілінкевіч назваў гульнямі. І заўважыў у размове з Еўрарадыё, што ў яго няма жадання ў іх удзельнічаць. Аляксандр Мілінкевіч: “Мы гуляем у вельмі сур’ёзныя палітычныя гульні. Гэта змаганне за краіну, гэта змаганне за незалежнасць і дэмакратыю. І як усляпую абіраць адзінага кандыдта, калі частка кандыдатаў кажа, што мы мусім прызнаць Асецію і Абхазію і ўвесці расійскі рубль, а другая — за Еўрапейскі выбар? А вы ўявіце сабе, што тыя, хто будзе ўдзельнічаць у гэтай працэдуры, мусяць сказаць: “Хто б ні выйграў, я буду яго падтрымліваць. Сур’ёзна гэта ці несур’ёзна?”

Мілінкевіч параўнаў спробы абрання адзінага з конкурсам прыгажосці. Дзя няма ні ідэі, ні ідэялогіі.

Нагадаем, днямі старшыня Рады беларускай інтэлегенцыі Ўладзімір Колас заявіў пра тое, што круглы стол па абранні адзінага кандыдата ад апазіцыі гатовы прыняць працэдуру вылучэння адзінага. Па яго словах, у вылучэнні адзінага бяруць удзел Яраслаў Раманчук, Мікалай Статкевіч, Аляксандр Казулін, Аляксандр Ярашук, Сяргей Калякін, Уладзімір Някляеў, Віталь Рымашэўскі і Рыгор Кастусёў.

Не вызначыўся са сваім удзелам канчаткова Андрэй Саннікаў, а Аляксандр Мілінкевіч і Алесь Міхалевіч адмовіліся удзельнічаць у працэдуры.