"Не выключаю, што гэта быў наркаман ці хворы чалавек" — Герасіменя расказала пра напад

Аляксандра Герасіменя расказала падрабязнасці нападу на яе на варшаўскім аўтавакзале.

Інцыдэнт адбыўся 10 ліпеня. Мужчына выйшаў з дзвярэй вакзала і ішоў ёй насустрач (хаця галоўная рэдактарка "Хартыі'97" Наталля Радзіна, якая першай паведаміла пра напад, сцвярджала, што злачынец падыйшоў са спіны). "Высокі, славянскай знешнасці, вузкі твар. Ніякіх прыкметаў таго, што ён хоча мяне ўдарыць, не было. Проста ішоў насустрач", — апісвае нападніка плыўчыха ў адказ на пытанне "Трыбуны".

Паводле Герасімені, ніхто з тых, хто быў навокал, не зрэагаваў на здарэнне. Ці не пабачылі, ці зрабілі выгляд, што нічога не адбылося.

"Не выключаю, што гэта быў наркаман ці хворы чалавек", — выказвае меркаванне спартоўка. Паводле яе, пасля нападу мужчына не ўцёк, а нейкі час заставаўся ў холе вакзала. Але беларуска не стала рызыкаваць і падыходзіць да яго. А пасля напісала заяву ў паліцыю: "Цяпер для мяне галоўнае, каб гэтага чалавека знайшлі".

Цяпер Герасіменя ў парадку — "толькі спалохалася і абыйшлася гузам". "Але пачуццё несправядлівасці ўсё адно не дае супакоіцца", — дадае яна.