Польскія ксяндзы знайшлі выйсце, каб іх не высылалі з Беларусі — katolik.life
Ксяндзоў без беларускага грамадзянства высылаюць з краіны, ілюстрацыйнае фота
Апошнім часам беларускія чыноўнікі сталі высылаць з краіны польскіх ксяндзоў, якія гадамі, а то і дзесяцігоддзямі служылі ў Беларусі. Ім не падаўжаюць дазволы на служэнне ў краіне.
Пасля 36 гадоў служэння пакінуў Беларусь ксёндз з Налібокаў Мар'ян Шэршань, які аднавіў там касцёл. Са Старых Васілішкаў выехаў айцец Збігнеў Драгула, які служыў у Беларусі 27 гадоў. Пакідае нашу краіну пробашч парафіі ў Свіры Багуслаў Маджэеўскі.
А ксёндз Лех Баханэк, які 25 гадоў служыў у Івянцы, як і некалькі іншых святароў плануюць падаць заявы на атрыманне беларускага грамадзянства. "Менавіта такую ўмову, наколькі было вядома вернікам, ставілі прадстаўнікі ўладаў польскім ксяндзам, якія служаць у Мінска-Магілёўскай архідыяцэзіі", — піша выданне katolik.life.
Калі святары атрымаюць беларускае грамадзянства, ім больш не спатрэбіцца атрымліваць дазвол на служэнне. Праўда, ёсць небяспека, што ў атрыманні грамадзянства могуць адмовіць — такія выпадкі раней былі.
