У Беларусі затрымалі грамадзяніна Літвы, які прыехаў да стараабраднікаў

У вёсцы Кукляны Пастаўскага раёна быў затрыманы грамадзянін Літвы. Гэта адбылося падчас рэлігійнай службы ў мясцовых стараабраднікаў.

Мужчыну абвінавачваюць у правядзенні рэлігійных службаў без адпаведнага права на тэрыторыі Беларусі, піша "Віцебская вясна".

Затрыманы меў намер афіцыйна зарэгістраваць рэлігійную суполку ў Пастаўскім райвыканкаме, але працоўная група выканкама выявіла ў пададзеных дакументах "прыкметы фальсіфікацыі".

Як адзначаюць праваабаронцы, вёска Кукляны — гістарычны цэнтр стараабрадніцтва на Віцебшчыне. Большасць мясцовых жыхароў належыць да Старажытнаправаслаўнай Паморскай царквы (беспапоўцы) і захоўвае ўласныя рэлігійныя абрады. Тут знаходзіцца ўнікальны гістарычны помнік — драўляная стараабрадніцкая царква Успення Прасвятой Багародзіцы, пабудаваная ў першай палове XIX стагоддзя.