У пажары на Шклоўшчыне жанчына выратавала свайго ўнука, але сама загінула
Наступствы пажару / СК Беларусі
На пажары ў Шклоўскім раёне загінулі муж і жонка, якія паспелі выратаваць свайго ўнука, паведамляе прэс-служба Следчага камітэта.
Паведамленне пра пажар дома ў аграгарадку Стараселле паступіла ўначы 9 чэрвеня. Пры ліквідацыі пажару ратавальнікі знайшлі целы мужа і жонкі – мужчыны 58 гадоў і жанчыны 47 гадоў.
Адна з відавочцаў расказала, што заўважыла дым у суседнім доме. Таксама яна пабачыла, як гаспадыня разбівае шкло ў акне. Падбегшы, суседка ўбачыла там дзіця. Гаспадыня дома перадала ёй свайго двухгадовага ўнука, а потым яе праз полымя больш не бачылі.
Хлопчык цяпер знаходзіцца ў рэанімацыі, яму аказваюць неабходную медыцынскую дапамогу.
Эксперты разглядаюць некалькі версій узнікнення пажару, у тым ліку няспраўнасць праводкі і неасцярожнае абыходжанне з агнём пры курэнні.
