Беларускага харэографа злавілі ў Пецярбургу з наркотыкамі

Тры гады пазбаўлення волі ўмоўна прызначыў Прыморскі раённы суд Санкт-Пецярбурга 30‑гадоваму беларусу, харэографу Мікіту Борысу. Яго прызналі вінаватым у незаконным захоўванні наркотыкаў у буйным памеры, піша "Наша Ніва".

Борыс нарадзіўся ў 1995 годзе ў Дзяржынску. У 2020‑м з адзнакай скончыў Акадэмію рускага балета імя Ваганавай па спецыялізацыі "мастацтва балетмайстра". У 2024‑м наш суайчыннік стаў лаўрэатам расійскай Нацыянальнай тэатральнай прэміі "Музычнае сэрца тэатра" ў намінацыі "найлепшае пластычнае рашэнне" — так быў адзначаны яго спектакль "Мядзведзь" у пецярбургскім Тэатры юнага гледача. З 2021 года ён супрацоўнічае з тэатрам эстрады імя Аркадзя Райкіна як рэжысёр па пластыцы і харэограф-пастаноўшчык.

Як вынікае з матэрыялаў справы, харэографа затрымала паліцыя позна ўвечары каля жылога дома. Мужчына сам прызнаўся, што мае ў заплечніку мефедрон. Паліцыянты знайшлі два пакецікі: у адным было 5,04 г, у другім — 0,25 г. Гэта лічыцца "буйным памерам", які прыкладна ў пяць разоў перавышае ніжнюю мяжу.

Сам Борыс паведаміў, што ўжывае мефедрон з лета 2025 года і захоўвае яго дома. У дзень затрымання ён узяў наркотык, разам са знаёмым зайшоў у госці, дзе яны ўжылі рэчыва, а па дарозе ў краму яго і спынілі. На момант затрымання беларус быў у стане алкагольнага і наркатычнага ап'янення. У яго тэлефоне слядоў гандлю наркотыкамі не выявілі.

Суд улічыў прызнанне віны, раскаянне і стан здароўя маці. Пасля затрымання Борыс самастойна стаў на ўлік у нарколага. Харэографу прысудзілі самае малое пакаранне, прадугледжанае адпаведным артыкулам Крымінальнага кодэкса.