Пракуратура спагнала 125 тысяч рублёў з трох кампаній за рэкламу на гістарычных будынках
Мінск, ілюстрацыйнае фота / Еўрарадыё
Пракуратура Савецкага раёна Мінска выявіла парушэнні пры выкарыстанні аб'ектаў гісторыка-культурнай спадчыны ў сталіцы.
Выявілася, што ў 2025 годзе тры прыватныя кампаніі выкарыстоўвалі аб'екты са статусам гісторыка-культурных каштоўнасцяў. Згодна з законам такое выкарыстанне лічыцца непасрэдным уздзеяннем на іх. У адным выпадку гаворка ішла аб размяшчэнні рэкламы на фасадах, у іншым — аб выкарыстанні аб'ектаў не для тых функцый, для якіх яны гістарычна прызначаліся.
Заканадаўства прадугледжвае, што кампаніі і прадпрымальнікі, чыя дзейнасць аказвае непасрэдны ўплыў на гісторыка-культурныя аб'екты ці іх ахоўныя зоны, абавязаныя пералічваць частку прыбытку ў фонд Лукашэнкі па падтрымцы культуры і мастацтва. Для юрыдычных асобаў гэта 5% ад прыбытку, атрыманага ад адпаведнай дзейнасці.
У выніку патрабавання пракуратуры фірмы пералічылі ў спецфонд больш за 125 тысяч рублёў.
