У Беларусі налічылі 135 тысяч арганізацый малога і сярэдняга бізнесу

На 1 студзеня 2026 года ў Беларусі дзейнічала 135 тысяч арганізацый малога і сярэдняга прадпрымальніцтва. Паводле даных Белстата, сярод іх было 132,8 тысячы малых арганізацый і 2,2 тысячы сярэдніх.

Уклад малога і сярэдняга прадпрымальніцтва ў ВУП Беларусі за 2025 год склаў 27,4%.

Паводле статыстычных даных, на арганізацыі малога бізнесу прыпала 17% ВУП, на сярэдні бізнес — 8%.

Таксама ў краіне налічвалася 204,4 тысячы індывідуальных прадпрымальнікаў і каля 250,5 тысячы фізічных асоб, якія ажыццяўлялі індывідуальную прадпрымальніцкую дзейнасць.

Індывідуальныя прадпрымальнікі забяспечылі 1,7% ВУП, яшчэ каля 0,7% прыпала на фізічных асоб, якія ажыццяўлялі індывідуальную прадпрымальніцкую дзейнасць.

Малыя арганізацыі складалі каля 98,4% ад агульнай колькасці суб'ектаў малога і сярэдняга прадпрымальніцтва, сярэднія — каля 1,6%.

Найбольш распаўсюджанай сферай дзейнасці сярод суб'ектаў малога і сярэдняга прадпрымальніцтва заставаліся аптовы і рознічны гандаль, а таксама рамонт аўтамабіляў і матацыклаў. На гэты сектар прыпадала 34,5% ад агульнай колькасці арганізацый і прадпрымальнікаў.

Яшчэ 13,9% працавалі ў сферы транспарту, складзіравання, паштовай і кур'ерскай дзейнасці.

Доля прамысловасці склала 8,5%, прафесійнай, навуковай і тэхнічнай дзейнасці — каля 7,6%, будаўніцтва — таксама каля 7,6%.

Выручка ад рэалізацыі прадукцыі, тавараў, работ і паслуг суб'ектаў малога і сярэдняга прадпрымальніцтва за 2025 год склала 328,3 мільярда рублёў. Іх уклад у агульны аб'ём выручкі па краіне дасягнуў 46,1%, гаворыцца ў апублікаваных даных.