Фінансавую справаздачнасць медыяхолдынга нявесткі Лукашэнкі засакрэцілі

Фінансавыя паказчыкі медыяхолдынга, якім кіруе нявестка Лукашэнкі, сталі "дзяржаўнай падатковай таямніцай" з 2025 года. Адпаведную пастанову выдаў Савет міністраў, заўважыла "Бюро".

Пад грыф "сакрэтна" трапілі амаль усе актывы, звязаныя з Ганнай Лукашэнка, больш вядомай як аўтарка тэкстаў песень Ганна Сялук. Гаворка ідзе пра "Музычную медыякампанію" (медыяпрадакшн), "Музычную частату" (яна акумулюе дзейнасць трох радыёстанцый) і нават нядаўна створанае рэкламнае агенцтва "Крэатыўны код".

Апошні год сям’я Лукашэнкі актыўна хавае структурныя і фінансавыя даныя кампаній, звязаных з імі асабіста ды іх блізкімі сябрамі. Раней была засакрэчаная фінансавая справаздачнасць фірмаў, якія кантралююць старэйшыя сыны Лукашэнкі — Віктар і Дзмітрый. Потым "дзяржтаямніцай" стала бухгалтарская справаздачнасць рыбнага холдынга Людмілы Няронскай, бізнэс-інтарэсы якой лабіруе клан Віктара Лукашэнкі.

На запыт "Бюро" аб прычынах сакрэтнасці прыватных фірмаў Міністэрства па падатках і зборах адказала, што "раскрыццё запытанай інфармацыі заканадаўствам не прадугледжана".

Пад грыф "сакрэтна" не трапіла толькі адна фірма з медыяхолдынга Сялук — "АНСЛ прадакшн". Яна мае долі ў "Музычнай медыякампаніі" і "Крэатыўным кодзе". Па выніках 2025 года чысты прыбытак "АНСЛ прадакшн" склаў 266 тысяч рублёў.

На чым канкрэтна зарабляе "АНСЛ прадакшн", дакладна невядома. Аднак з 2023 па 2025 гады фірма падавала дэкларацыі па падатку на нерухомасць арганізацый. Гэта значыць, на яе балансе ёсць нерухомасць, якую можна здаваць у арэнду.