"Культура — гэта фундамент грамадства". Алесь Бяляцкі пра развіццё беларускай культуры

Праваабаронца і нобелеўскі лаўрэат Алесь Бяляцкі лічыць, што беларуская культура фарміруе нацыянальную ідэнтычнасць і застаецца інструментам супраціву аўтарытарызму і "рускаму свету". Такім меркаваннем ён падзяліўся з Еўрарадыё ў кулуарах Касцюшкаўскага форуму, які сёння адкрыўся ў Гданьску.

"Я перакананы, што культура — гэта не ўпрыгожванне грамадства, а яго фундамент. Менавіта праз культуру народ усведамляе сябе, сваё імя і сваё права на існаванне. Калі мы гаворым пра Беларусь, мы гаворым пра мову, пра песню, пра літаратуру, якія ўтрымліваюць нас ад растварэння.

У умовах ціску культура становіцца формай супраціву — ціхай, але ўстойлівай. Яе немагчыма адмяніць указам або забараніць назаўсёды — яна альбо жыве, альбо вяртаецца. І пакуль існуе культура, існуе і сам народ, нават калі яго спрабуюць пазбавіць голасу", — лічыць Бяляцкі.

Асобная ўвага ў размове была нададзена сітуацыі з дыялогам паміж Захадам і рэжымам Лукашэнкі. Бяляцкі назваў цяперашнія кантакты тактычнымі і не здольнымі вырашыць сістэмны крызіс. Ён падкрэсліў неабходнасць удзелу дэмакратычных сіл у любых будучых перамовах.