Палац Радзівілаў у Дзятлаве купіла за 90 рублёў грамадзянка Расіі

Былы палац Радзівілаў у Дзятлаве прадалі праз аўкцыён за сімвалічную суму — 90 рублёў (дзве базавыя велічыні), ці крыху больш за 30 долараў.

Новай уласніцай гістарычнага помніка стала грамадзянка Расіі Таццяна, якая жыве цяпер у Мінску. Як паведамляе інфарагенцтва Sputnik, расіянка была адзінай удзельніцай аўкцыёну.

Згодна з умовамі куплі новы ўладальнік абавязаны правесці аднаўленчыя работы і на працягу некалькіх гадоў увесці аб’ект у эксплуатацыю.

Уладальніца плануе бліжэйшым часам пачаць паэтапную рэстаўрацыю і найперш аднавіць цэнтральны ўваход і частку ўнутраных памяшканняў. Туды могуць вадзіць экскурсіі. У перспектыве на базе палаца ўладальніца хоча адкрыць кавярню, апарт-гатэль, выстаўныя і інтэрактыўныя прасторы, а ў сутарэннях стварыць тэматычныя зоны.

Палац з’яўляецца гісторыка-культурнай каштоўнасцю другой катэгорыі. Яго будаўніцтва адносяць прыкладна да 1751 года, а ўзводзіў будынак, паводле адной з версій, італьянскі архітэктар Даменіка Фантана.

Спробы прадаць палац рабіліся з 2021 года, але пакупнікоў доўгі час не было, адзначае hrodna.life. У 2022 годзе будынак прадалі расійскаму бізнесоўцу за 100 беларускіх рублёў. Ён павінен быў цягам двух гадоў падрыхтаваць праектную дакументацыю, а на працягу пяці гадоў зрабіць рэканструкцыю ці капітальны рамонт. Аднак пазней палац зноў вярнуўся ва ўласнасць дзяржавы.