"Гаманец Лукашэнкі" адмываў грошы праз банкі Вануату і Новай Зеландыі — БРЦ

"Тытунёвы кароль" Аляксей Алексін, якога называюць "гаманцом Лукашэнкі", займаецца легалізацыяй шэрых даходаў праз заходнія юрысдыкцыі. Гэта сцвярджаюць журналісты Беларускага расследвальніцкага цэнтра (БРЦ), якія вывучылі дакументы новазеландскай кампаніі Worldclear і банка Pacific Private Bank (PPB), зарэгістраванага ў Вануату.

Паводле іх, шматмільённыя пераводы праходзілі цягам некалькіх гадоў праз сетку кампаній у афшорных юрысдыкцыях. Ключавой фігурай у схеме, як сцвярджаюць у БРЦ, быў літоўскі прадпрымальнік Вілюс Каваляўскас, які з 2014 па 2018 гады валодаў банкам PPB.

Кампаніі Алексіна пераводзілі грошы з МТБанка пад выглядам перадаплаты за нафтапрадукты. Потым кантракт скасоўвалі, а перадаплату вярталі. Але за тыя некалькі месяцаў, якія праходзілі да вяртання "перадаплаты", кіпрская фірма-атрымальнік Sumsteg International Limited выдавала з гэтых грошай кароткатэрміновыя крэдыты, зарабляючы на працэнтах. Гэтая кампанія належала Мехці Мехціеву — сябру Дзмітрыя Алексіна, сына "тытунёвага караля". Прычым кіравала ёй літоўская кампанія Каваляўскаса Lewben, якая і раней абслугоўвала інтарэсы "гаманцоў Лукашэнкі".

Ад 2015 па 2021 год бакі скасавалі дамовы з перадаплатай амаль на 500 млн долараў.

Частку сродкаў фірма Sumsteg выводзіла праз Pacific Private Bank у Вануату праз новазеландскую плацежную сістэму WorldClear. Потым грошы пералічваліся ўжо на асабісты рахунак Алексіна пад выглядам вяртання пазык. Расследвальнікі БРЦ сцвярджаюць, што ім удалося адсачыць мінімум 3,5 млн долараў, якія трапілі такім чынам на рахунак Алексіна.

Эксперты па фінансавых злачынствах мяркуюць, што ў гэтай схеме ёсць прыкметы ўтойвання паходжання сродкаў і магчымай нявыплаты падаткаў.