Расійскага Z-дыпламата прызначылі адкрываць філіял амбасады ў Гомелі

У Гомелі плануецца адкрыць аддзяленне расійскай амбасады. Дзеля гэтага ў горад перавялі новага дыпламата, які носіць гадзіннік з літарай Z, заўважыла выданне "Флагшток". Такія гадзіннікі былі выпушчаныя лімітаванай серыяй у падтрымку вайны Расіі супраць Украіны.

Цыферблат гадзінніка некалькі разоў паказалі ў сюжэце на гомельскім дзяржаўным тэлеканале. Імя дыпламата ў сюжэце не назвалі. Але "Флагшток" высветліў, што гаворка  ідзе пра Аляксея Галаўнёва — ён прызначаны першым сакратаром аддзялення амбасады РФ у Гомелі.

У чэрвені ён ужо на гэтай пасадзе правёў у "Рускім доме" кансультацыю па консульскіх пытаннях. Атрымліваецца, што фактычна аддзяленне амбасады ў Гомелі ўжо працуе. Кіраўнік філіі размясціўся ў "Рускім доме", а цяпер, імаверна, ідуць перамовы пра пераезд аддзялення амбасады ва ўласны будынак.

Вядома, што Галаўнёў як мінімум у 2015-2018 гадах працаваў трэцім сакратаром амбасады Расіі ў Малдове. Потым яго сляды губляюцца. У Гомелі ён з'явіўся напярэдадні закрыцця "Рускага дома" ў Кішынёве.