У Расіі знішчаць 40 тысяч армянскіх ружаў, якія везлі праз Беларусь
Армянскія ружы, якія везлі праз Беларусь / 32.fsvps.gov.ru
У Смаленскай вобласці РФ работнікі Рассельгаснагляду выявілі партыю свежазрэзаных ружаў з Арменіі, якую везлі праз Беларусь
Паводле дакументаў у аўтамабілі, які ехаў з Мінскай вобласці ў Маскву, перавозілі безалкагольныя танізавальныя газаваныя напоі. Аднак праверка выявіла замест газаваных напояў у машыне 39 200 ружаў. Іх перавозілі без суправаджальных фітасанітарных і таварасуправаджальных дакументаў. На частцы каробак, як заяўляюць у Рассельгаснаглядзе, захаваліся этыкеткі, дзе краінай прадукцыі пазначаная Арменія.
Ружы пастанавілі знішчыць, а перавозчыка — прыцягнуць да адміністрацыйнай адказнасці.
У Расіі з 12 чэрвеня ўведзеныя часовыя абмежаванні на ўвоз і транзіт "падкаранціннай прадукцыі", якая паходзіць з Арменіі або накіроўваецца з гэтай краіны. Гэтае рашэнне ў Маскве патлумачылі выяўленнем "парушэнняў фітасанітарных патрабаванняў".
