Расійскія дроны перасталі лятаць уздоўж украінска-беларускай мяжы — "Флагшток"

Апошнія трое сутак пралёты расійскіх ударных дронаў уздоўж беларуска-ўкраінскай мяжы не фіксуюцца. Гэта заўважыла рэгіянальнае выданне "Флагшток".

Пры канцы вясны і на пачатку лета 2026 года такія пралёты былі масавымі. Частка беспілотнікаў рухалася на нізкіх вышынях і трапляла на тэрыторыю Беларусі, іх назіралі жыхары прыгранічных населеных пунктаў.

На цяперашні час апошні пралёт беспілотніка фіксаваўся раніцай у нядзелю 21 чэрвеня. Тады ўкраінскія Паветраныя сілы паведамлялі, што на паўночным захадзе Чарнігаўскай вобласці ўздоўж мяжы з Беларуссю рухаецца дрон у кірунку Славуціча.

Прыкладна праз тры гадзіны адзін з расійскіх дронаў, як заўважыў тг-канал "Рында маніторыць", апынуўся на тэрыторыі Беларусі. Спярша паведамлялася, што ён рухаўся ў раёне Турава Гомельскай вобласці, а потым знаходзіўся каля Давыд-Гарадка на Брэстчыне.

Ці вылецеў ён назад на тэрыторыю Украіны, не ўдакладнялася. Таксама невядома, ці быў гэта той самы дрон, які раней рухаўся ўздоўж мяжы на Гомельшчыне.

Пры гэтым Чарнігаўшчына ў наступныя дні зноў была пад атакай расійскіх дронаў, але іх накіроўвалі іншымі маршрутамі, не закранаючы ўкраінска-беларускае памежжа.

Ці азначае гэта, што расійскія рэтранслятары беспілотнікаў на тэрыторыі Беларусі сапраўды адключаныя, як гэтага патрабаваў прэзідэнт Украіны? "Флагшток" звяртае ўвагу, што рабіць высновы рана, бо гэтымі днямі не было масіраваных паветраных нападаў РФ.

Тэрмін украінскага ультыматуму па адключэнні расійскіх рэтранслятараў заканчваецца ў пятніцу.